Non mi lassari mai

 

I to occhi beddi vìdiri vulissi

chi di celu e luci sunnu chini

tantu ca dda intra ci murissi

pirdendumi 'ntra gioi senza fini.

 

Ora mi pari di vìviri 'nto 'n sognu

chi mi porta luntanu di 'sta terra

di tia è sempri tantu lu bisognu

purtasti a paci a lu me cori 'n guerra.

 

Ddi labbra duci jò l'aiu a baciari

sulu ducizzi dinnu e no 'u mali

luntanu sunnu li jurnati amari

quannu vulìa vulari senza l'ali.

 

E t'aiu a teniri i mani 'nte me mani

picchì sì tutta la me vita, sai?

Vogghiu stari cu ttia, no finu a dumani

ma sempri, sempri, non mi lassari mai!