'A  Nuvena

di Vittorio Aprea

Nu zampugnaro, tutto affardellato,

venette p’’a novena da ‘o paese.

‘Mmiez’a tempeste, neve e ventecate

lassaje li muntagne d’’o Matese…

Ullero, ullero, ‘stu bello figliulo,

p’’e vvie stramane sunava isso sulo…

  mentre sunava,

penzava ‘a ‘nnammurata  soja luntana…

Al centro d’’a Turretta, spaisato,

isso arrivaje verzo miezjuorno.

Sentènnose sperduto e stupetiato,

fissava ‘a folla ‘e ggente attuorno attuorno…

Ullero, ullero, e che folla ce steva!

Chi se ‘ntalliava, chi invece correva…

  E ‘stu guaglione

Se sentette ‘e piglia’ d’’a cummuzione!

‘Mmiez’a ‘sta gente ca jeva e veneva

vedette ‘na figliola jonna e bella.

Sùbbeto dint’’o sanghe ‘n’ata freva

sentette ‘e l’avvampa’ pe’ chella stella…

Ullero, ullero, e stu cafunciello

Se ce attaccaje a chella vunnella

e…d’’o paese

se scurdaje dint’a poco e cchiù ‘e nu mese!

‘Ncopp’’e muntagne fredde d’’o Matese

‘na cafuncella rossa sta aspettanno

ca fernesce ‘a Nuvena ‘int’a stu mese

e guarda da ‘a funesta…sbarianno…  

  Ullero, ullero, e che suonno d’ammore

Aspetta e spera cu’ gioia ‘int’’o core…

  Ma ‘o ‘nnammurato ‘a Nuvena  sunanno sta

 pe’ ‘n’ata !!!