Felippo Sgruttendio

 de Scafato

(secolo XVII)

Comme lo ferette ammore

Cecca se mese duie galante zuòccole,

e dinto avea le scarpe co doi sole,

e quanta scarpesava nterra spruòccole,

tanta faceva nascere viole!

Cadere mo me pòzzano le mole,

né chiù mangiare torza e manco vruòccole,

s'essa, co tanta sfarze e tanta gnuòccole,

non parze lo stannardo de lo sole!

Iuro pe cierto ch'ogne zoccolata,

oimè! che sentea scìrele da sotta,

parette a st'arma mia na scoppettata!

Ogn'uno senta sta parola addotta:

non fu, la chiaia mia, de na frezzata,

ch'è stata de no zuòccolo na botta.